Ազգային ժողովը երկրորդ ընթերցմամբ քննարկեց «Բարգավաճ Հայաստան» խմբակցության պատգամավորներ Արթուր Դալլաքյանի, Արտյոմ Ծառուկյանի, Արթուր Գրիգորյանի, Արման Աբովյանի «Պետական սահմանի մասին» օրենքում լրացումներ կատարելու մասին նախագիծը:
Ըստ նախագծի հեղինակների՝ պետական սահմանին վերահսկողություն իրականացնելու լիազորությունից անհիմն զրկվել է տրանսպորտի բնագավառում վերահսկողություն իրականացնող տեսչական մարմինը: Նախագծով նախատեսվում է, որ տեսչական մարմինը պետական սահմանին իրականացնի ավտոտրանսպորտային օրենսդրության պահպանման նկատմամբ վերահսկողություն:
Նախագծի համահեղինակ, «Բարգավաճ Հայաստան» խմբակցության պատգամավոր Արթուր Դալլաքյանը երկրորդ ընթերցմամբ քննարկման ընթացքում նշեց, որ օրենքը ուժի մեջ կմտնի 2022 թվականի հունվարի 1-ից: «Բոլոր միջազգային փոխադրումները 2022 թվականից կանցնեն բոլոր տեսակի ստուգումները: Հանգեցինք նրան, որ տեսչական մարմինը վերազինվելու ժամանակ ունենա, որպեսզի հունվարի 1-ից տվյալ օրենքի կիրառումը կարողանա ճիշտ աշխատել երկրում»:
Նախագիծն առաջին ընթերցմամբ ընդունվել է 2020-ի սեպտեմբերին:
