Եվրահանձնաժողովը հաստատել է Ուկրաինային լրացուցիչ 6,1 միլիարդ եվրոյի վարկի տրամադրումը՝ Ukraine Support Loan ծրագրի շրջանակում։ Հատկացված միջոցներով Ուկրաինան կկարողանա ձեռք բերել PAC-3 Patriot հրթիռներ, անօդաչու թռչող սարքեր, էլեկտրոնային պատերազմի և օդային ու հրթիռային պաշտպանության այլ համակարգեր, ինչպես նաև զինամթերք։
«Այս անհապաղ անհրաժեշտ ֆինանսավորումը կօգնի ամրապնդելու Ուկրաինայի կարողությունը՝ դիմակայելու Ռուսաստանի կողմից անընդհատ աճող բալիստիկ հրթիռների և անօդաչու թռչող սարքերի հարվածներին»,- նշված է Եվրահանձնաժողովի հայտարարության մեջ։
Այս աջակցության փաթեթը ֆինանսավորվում է Ուկրաինային օգնելու համար նախատեսված ընդհանուր 90 միլիարդ եվրոյի վարկային ծրագրից։
Եվրահանձնաժողովում հավելել են, որ ընթացիկ տարում Ուկրաինայի պաշտպանական կարիքների համար արդեն իսկ հատկացվել է 8,35 միլիարդ եվրո, իսկ լրացուցիչ միջոցները փոխանցվելու են մոտ ապագայում։
