Միացյալ Նահանգների համար ՆԱՏՕ-ի դաշնակիցների վարքագիծը, որոնք հրաժարվել են աջակցել Իրանի դեմ պատերազմին, «շատ հիասթափեցնող» էր, և ռազմական գործողության ավարտից հետո Վաշինգտոնը կվերանայի իր հարաբերությունները դաշինքի հետ: Այս մասին հայտարարել է ԱՄՆ պետքարտուղար Մարկո Ռուբիոն «Ալ Ջազիրա» հեռուստաալիքին տված հարցազրույցում։

Հեռուստաալիքի թղթակցի հարցին՝ Ռուբիոն համարո՞ւմ է արդյոք, որ ԵՄ-ի և ՆԱՏՕ-ի երկրները դավաճանել են Միացյալ Նահանգներին «այդ վճռորոշ պահին», ԱՄՆ պետքարտուղարը պատասխանել է. «Կարծում եմ՝ դա շատ հիասթափեցնող էր։ Եվ, կրկնում եմ, նախագահը և մեր երկիրը պետք է վերանայեն այս ամենը գործողության ավարտից հետո։ Պատճառներից մեկը, որ ՆԱՏՕ-ն շահավետ է Միացյալ Նահանգներին, բազաներին հասանելիությունն է տարբեր սցենարների դեպքում»։

Նա հիշեցրել է, որ «անհրաժեշտ պահին», երբ ԱՄՆ-ն որոշել է, որ գոյություն ունի լուրջ սպառնալիք երկրի ազգային անվտանգությանը և շահերին, Վաշինգտոնը բախվել է այն բանին, որ ՆԱՏՕ-ի անդամները, մասնավորապես Իսպանիան, հրաժարվել են թույլ տալ օգտագործել իրենց բազաները: «Կան նաև այլ երկրներ, որոնք նույն կերպ են վարվել»,- ավելացրել է Ռուբիոն: Եվ այդ ժամանակ, նրա խոսքով, հարց է ծագում՝ «ո՞րն է այստեղ ԱՄՆ շահագրգռվածությունը»:

«Ես միշտ աջակցել եմ ՆԱՏՕ-ին, և այդ աջակցության պատճառներից մեկն այն է, որ բազաներին հասանելիությունը մեզ ազդեցության լծակներ և ճկունություն է տալիս ռազմական գործողություններում ամբողջ աշխարհում: Բայց եթե ՆԱՏՕ-ն միայն նրա համար է, որ մենք պաշտպանենք Եվրոպան հարձակման դեպքում, իսկ մեզ մերժեն բազաների հասանելիության հարցում, երբ դրանք մեզ պետք են, դա այնքան էլ լավ համաձայնագիր չէ: Այդ ձևաչափով դժվար է մնալ ներգրավված և ասել, որ դա շահավետ է Միացյալ Նահանգներին: Ուստի այս ամենը պետք է վերանայվի: Այս ամենը պետք է վերանայվի»,- ասել է նա: