Իսրայելի վարչապետ Բենիամին Նեթանյահուն պետք է անհապաղ ներում ստանա, Իսրայելի նախագահ Իսահակ Հերցոգը «սարսափելի է վարվում»՝ դա չտրամադրելով։ Այս մասին հայտարարել է ԱՄՆ նախագահ Դոնալդ Թրամփը The Times of Israel-ին տված հարցազրույցում։

Նեթանյահուն Իսրայելում մի քանի քրեական գործերով է անցնում։ Դատախազությունը նրան մեղադրում է կաշառակերության, խարդախության և վստահության չարաշահման մեջ։

Թրամփը նաև հայտարարել է, որ Իրանի հետ պատերազմը դադարեցնելու որոշումը կկայացվի Նեթանյահուի հետ միասին: Սպիտակ տան ղեկավարը նշել է, որ ինքը իրավիճակը քննարկում է Իսրայելի վարչապետի հետ և մտադիր է հաշվի առնել Իսրայելի դիրքորոշումը՝ ռազմական գործողությունների դադարեցման ժամկետը որոշելիս: Այնուամենայնիվ, վերջնական որոշումը, նշել է ԱՄՆ նախագահը, կկայացնի Վաշինգտոնը։

Ամերիկացի առաջնորդը կարծիք է հայտնել, որ եթե ինքը և Նեթանյահուն չմիջամտեին, Իսլամական Հանրապետությունը կոչնչացներ Իսրայելը. «Իրանը պատրաստվում էր ոչնչացնել Իսրայելը և մնացած ամեն ինչ դրա շուրջը։ Մենք միասին աշխատեցինք։ Մենք ոչնչացրինք մի երկիր, որը ցանկանում էր ոչնչացնել Իսրայելը»։

Թրամփը նաև վստահություն է հայտնել, որ Իսրայելը կարիք չի ունենա շարունակելու ռազմական գործողությունները ամերիկյան հարվածների հնարավոր դադարեցումից հետո։