Միջազգային հարաբերություններն ապրում են քաոս և արմատական փոփոխություններ, իսկ գլոբալ անվտանգության հիմքերը սասանվում են ԱՄՆ-ի հեգեմոնիկ քաղաքականության պատճառով։ Այս մասին հայտարարել է ԿԺԴՀ առաջնորդ Կիմ Չեն Ընը Կորեայի աշխատավորական կուսակցության IX համագումարի ընթացքում, որը տեղի է ունեցել Փհենյանում փետրվարի 19-ից 25-ը։
«Ներկայիս աշխարհը լիովին տարբերվում է հինգ տարի առաջվա աշխարհից։ ԱՄՆ-ի հեգեմոնիկ քաղաքականության և կամայականությունների պատճառով երկրագնդի բոլոր անկյուններում սասանվում են անվտանգության հիմքերը և չեն դադարում զինված բախումները», — ընդգծել է Հյուսիսային Կորեայի առաջնորդը՝ ըստ ЦТАК գործակալության։
Կիմ Չեն Ընը նշել է, որ ԱՄՆ-ի գլխավորությամբ արևմտյան ուժերը բացահայտորեն խախտում են այլ պետությունների ինքնիշխանությունը և ոտնահարում միջազգային իրավունքը։ Ըստ նրա՝ Վաշինգտոնը, գործելով «Ամերիկան՝ նախևառաջ» կարգախոսի ներքո, ձգտում է «խաղաղության՝ ուժի դիրքերից»՝ բավարարելու համար սեփական հավակնությունները և առանց վարանելու դիմում է զինված ագրեսիայի։
Կորեայի աշխատավորական կուսակցության գլխավոր քարտուղարը եզրակացրել է, որ աշխարհն ուշացումով է հասկանում մի կարևոր փաստ. քանի դեռ գոյություն ունի իմպերիալիզմը, միջազգային իրավունքը ընդամենը դատարկ խոստում է։
