Ըստ The Times-ի՝ բրիտանացի քննիչները, որոնք ուսումնասիրում են նախկին արքայազն Էնդրյուի կապերը ֆինանսիստ Ջեֆրի Էփշտեյնի հետ, բախվել են փաստաթղթերի բացակայության խնդրին։ Պարզվել է, որ մի շարք կարևոր տվյալներ ոչնչացվել են՝ պահպանման սահմանված ժամկետի ավարտից հետո։

Խոսքը վերաբերում է շուրջ երկու տասնամյակ առաջվա թռիչքների գրանցումներին, որոնք կարող էին առնչվել Էփշտեյնի և նրա շրջապատի Մեծ Բրիտանիա կատարած այցերին։ Քննության շրջանակում դիտարկվում է նաև վարկած, թե Էնդրյուն որոշ հանդիպումների կարող էր մեկնել ռազմական օդանավերով։ Սակայն Royal Air Force-ում ուղևորների ցուցակները պահպանվում են ընդամենը երեք ամիս, որից հետո ենթակա են ոչնչացման։

Սա զգալիորեն սահմանափակել է քննիչների հնարավորությունները, քանի որ ենթադրյալ տեղաշարժերի մասին տվյալները այլևս հասանելի չեն։ Արդյունքում՝ գործի մի շարք հանգամանքներ հաստատել կամ հերքել դարձել է գրեթե անհնար։

Միևնույն ժամանակ, առևտրային ավիափոխադրողները նման տեղեկատվությունը պահպանում են մինչև յոթ տարի, ինչն, ըստ փորձագետների, կարող է լրացուցիչ աղբյուր հանդիսանալ հետաքննության համար։