Բրիտանական The Economist շաբաթաթերթն իր նոր համարի շապիկին տեղադրել է օձի պատկեր՝ ԱՄՆ դոլարի խորհրդանիշով։

Լիակատար համարը կհրապարակվի փետրվարի 7-ին։ Առցանց տարբերակում նկարազարդումն ուղեկցում է «Նենգ, անկում ապրող դոլարի դարաշրջանը» վերնագրով հոդվածին։ Լրագրողները զգուշացնում են, որ ամերիկյան ակտիվների սեփականատերերը ստիպված կլինեն սովորել նոր ռիսկերին։

Հեղինակների կարծիքով՝ ԱՄՆ տնտեսությունը մնում է տպավորիչ, բայց իրականությունն ավելի բարդ է։ Անցյալ տարվա հունվարից՝ Դոնալդ Թրամփի երդմնակալությունից հետո, դոլարը կորցրել է իր արժեքի մոտ 10%-ը արժույթների զամբյուղի նկատմամբ, մինչդեռ եվրոյով արտահայտված ԱՄՆ բաժնետոմսերը տարվա ընթացքում գրեթե չեն աճել։ Վերջին շաբաթներին դոլարն անկայուն է եղել. Գրենլանդիայի նկատմամբ Թրամփի պահանջների մասին լուրերի ֆոնին արժույթը նվազել է 1,5%-ով, չնայած դոլարի ինդեքսը քիչ անց կրկին բարձրացել է։

Ամսագիրը նշում է, որ անկայուն քաղաքականությունը և փոխարժեքի տատանումները դոլարի տիրապետումն ավելի ռիսկային են դարձնում, չնայած դրա՝ որպես աշխարհի պահուստային արժույթի կարգավիճակին։ The Economist-ը նաև նշում է Քևին Ուորշի նշանակումը Դաշնային պահուստային համակարգի ղեկավարի պաշտոնում. փորձառու բանկիրը նպաստեց դոլարի ամրապնդմանը և ոսկու գների իջեցմանը՝ փորձելով վերականգնել կայունությունը։

Հեղինակներն ընդգծում են, որ ներդրողները դոլարին քիչ այլընտրանքներ կգտնեն, ուստի ԱՄՆ-ն պահպանում է իր գերիշխող դերը միջսահմանային գործարքներում։ Միևնույն ժամանակ, նրանք զգուշացնում են, որ ակտիվը, որը երկար ժամանակ համարվում էր անվտանգ, այժմ համաշխարհային ռիսկերի է ենթարկվում։